جريدة الاضواء الالكترونية
مقالات مشابهة
حاوره / علاء عبد طاهر فلحي
* كابتن حسن بداية نريد نتعرف على “حسن برص” للقراء. من وين اللقب وشلون دخلت عالم الملاكمة؟
حسن برص: هلا بيك استاذ علاء وبكل أهل البصرة. اللقب “برص” انطونياه الشباب بالنادي لأن حركتي سريعة بالحلبة وما أثبت بمكاني. من عمر 12 سنة وأنا اتمرن بمركز شباب البصرة. الظروف الصعبة هي اللي دفعتني. ما عندي غير جسمي وإرادتي.
*شنو أصعب شي واجهك بطريقك؟
حسن برص: الفقر أولا. ثانيا الإهمال. نتمرن بلا كفوف زينة، بلا تغذية، بلا قاعة محترمة. مرات 3 شهور بدون راتب. بس اللي يحب هاي اللعبة ما يلتفت. أتذكر بطولة العراق 2019 انضربت ضربة طيحتني بالجولة الثالثة، كمت لأن تذكرت تعب أمي. وفزت باللقب ذاك اليوم.
علاء: برأيك ليش الملاكمة العراقية بعدها ما واصلة للعالمية؟
حسن برص: لأن ماكو تخطيط. ماكو معسكرات. ماكو احتراف. اللاعب يفوز بطولة وبعدها يرجع يشتغل تكسي حتى يعيش. الدول الثانية تصرف على البطل من هو عمره 14 سنة، واحنا نكتشفه من يفوز وبعدين ننساه.
* رسالتك للشباب اللي دا يضيع بالمخدرات والفراغ؟
-حسن برص: أخوي تعال للحلبة. الملاكمة تعلمك الانضباط. تعلمك تحترم نفسك قبل لا تحترم خصمك. تعلمك إذا وكعت لازم تكوم. المخدرات توكعك وما تخليك تكوم بعد. الرياضة هي الطريق.
* ما هو حلمك القادم؟
-حسن برص: حلمي البسيط والصعب بنفس الوقت: أمثل العراق بالأولمبياد وأجيب ميدالية. وبعدها أفتح أكاديمية بالبصرة مجانية. أريد أطلع 10 أبطال من أزقة البصرة الفقيرة. ما أريد موهبة تضيع بعد.
*كلمة أخيرة للمسؤولين عن الرياضة ووزارة الشباب؟
– حسن برص: أقولهم ترى الرياضة أرخص استثمار. بدل ما تصرف مليارات على مشاريع وهمية، ادعم رياضي. اليوم تنطيني 500 ألف، باجر أرفع علم العراق وأفرح مليون عراقي. احنا ما نريد قصور، نريد قاعة، معدات، ومعسكر. انطونا فرصة ونشوف النتيجة.
* كلمة أخيرة لجمهورك بالبصرة؟
-حسن برص: أحبكم. دعواتكم هي اللي توكفني. أوعدكم ما أخيب ظنكم. وعهد علي من أصعد الحلبة أصعد باسم البصرة وباسم العراق.
*شكرا كابتن حسن برص. نتمنالك التوفيق وننتظرك بالميدالية الذهبية.
