الرئيسية / الثقافية / خويط السمه

خويط السمه

شعر : حمزه راضي الفريجي ـ العراق

الليل كرب
والظلام أغطاي
وأنه العطشان ألج
عطش العطش
للماي
أعاتب ذيج
شح بيها اللسان
وبلع حجي أهواي
ألتمن بالكلب
جانون
شواني أمن الزغر
وأردف أبشيبي
شواي
كلت خله العمر
دخان
يمر فوك السمه
بهداي
وأنه أمتاني
يمر جدمك علي خطار
يا ليل العمر
ومكالب آوي الليل
ليل أبليل
أفرزن ذيج
يأخذني الحزن
وي هاي
أكابر
وأرتجي
ريح الصبا وياي
يمرجنح الوكت
دولاب
أرد أردود
مثل القوس
والنشاب
أصيرن خيط
يلضمني الوكت
بأبره
أخيط أسرود
شيناتك
يبعد أجلاي
ما فاد الصبر
بالطاس
تبده الكأس
ورث بالكلب
جانون
مثل حطاب
أيده الفأس
وأنه الماكول
من زغر العمر
بيس أديه الفأس
صرت خيط السمه
المكطوع
ميت لا نفس
لا رأس
لا رأس

 

شاهد أيضاً

توحد

شعر : رزاق مسلم الدجيلي ـ العراق     كيف لي أن اتوحد معك وانا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

2 × أربعة =