جريدة الاضواء الالكترونية
مقالات مشابهة
بقلم: علاء عبد طاهر فلحي
مع التحية إلى كل لاعب انكسر حلمه على باب نادي
مع التحية إلى كل بطل مات قهر وهو يشوف الفاسدين يلعبون باسمه
بالعراق الموهبة تنولد وتموت بنفس اليوم
عدنا لاعبين يكسرون الدنيا بالحارة بس من يوصل للاتحاد يطلبون منه واسطة وفلوس
عدنا ملاعب تراب ومدربين شهاداتهم من سوق الجمعة وادارات تسرق فلوس الدعم وتشتري بيها سيارات
اللاعب العراقي يتدرب بالحر والبرد وبدون راتب وبدون تجهيزات وبعدين يجي واحد ابن مسؤول يلبس الفانيلة وهو ما يعرف يركض
بطولاتنا صارت مزاد منو يدفع اكثر يلعب ومنو عنده ظهر يمثل الوطن
ملاعب بمليارات مبنية بس للتصوير والافتتاح وبعدها تنسد
والاتحادات صارت شركات خاصة للعوائل الفاسدة توزع المناصب والسفرات على مزاجهم
احنا مو فاشلين رياضيا
احنا دا يتم قتل الرياضة عمدا
دا يذبحون الحلم مال طفل يريد يرفع علم العراق
دا يبيعون اسم العراق ببطولات ودية وهمية حتى ياخذون مكافئات
كافي
نريد لاعب يلعب بعرقه مو بواسطة عمه
نريد مدرب يفهم مو صاحب حزب
نريد اتحاد يخدم الرياضة مو الرياضة تخدم جيبه
نريد ملعب للفقير قبل القصور
اذا بقينا ساكتين بعد 10 سنين راح نلعب بكرة بلاستك بملعب طين ونكول هذا هو الانجاز
